Звязда № 63 (25928),4.04.2007 Беларускае таварыства сяброўства i культурнай сувязi з замежнымi краiнамi прадставiла выставу легендарнага нямецкага мастака Хельмута Малецке. Неардынарны чалавек, адораны рознымi талентамi, да таго ж не пазбаўлены рашучасцi, Хельмут Малецке пакарыў свет i ўвайшоў у гiсторыю Германii яшчэ i дзякуючы сваёй грамадзянскай пазiцыi.

З-за сваiх поглядаў ён пацярпеў як творца, праўда, гэта было задоўга да разбурэння Берлiнскай сцяны, яшчэ ў ГДР. Напачатку 70-х Малецке была вынесена забарона на прафесiю дзяржаўнымi органамi ГДР, яго абвiнавачвалi ў скажэннi свядомасцi людзей, забаранялi прадстаўляць свае працы ў публiчных месцах. Але творы Малецке знаходзiлi шлях да людзей — некаторыя з iх выстаўлялiся ў цэрквах. У адной з iх — царкве святой Марыi ў горадзе Грайфсвальдзе, дзе сам жыве, мастак перааформiў памятную дошку ў гонар герояў Другой сусветнай вайны.
Мастацкiя творы Хельмута Малецке дэманстравалiся ў Вялiкабрытанii, Швейцарыi, Швецыi, Польшчы, Чэхii, Фiнляндыi, Алжыры, таксама за акiянам — на Кубе i ў ЗША. Ён лаўрэат 10 мастацкiх конкурсаў. Але вядомы яшчэ як i пiсьменнiк i паэт, Малецке абраны ганаровым членам Германскага саюза пiсьменнiкаў.
У нас ёсць магчымасць паглядзець мастацкiя творы чалавека, iмя якога называюць у лiку дзесяцi лепшых германскiх мастакоў.