Кроніка грамадзкага жыцьця Гарадзеншчыны ад Грамадзкага аб’яднаньня “Цэнтр “Трэці сектар” ад 19.05.2005г.

а/с 54, Гародня, 230009,

тэл./факс (0-152) 75-71-72,

e-mail:

www.sektar.cjb.net

ПАДЗЕІ

Навучанньне і інтэграцыя

Павышэньне якасьці адукацыйных праграм для моладзі — гэтая мэта лягла ў аснову міжнароднага праекту, удзел у якім разам з партнэрамі з Польшчы, Партугаліі, Гішпаніі, Аргентыны, Польшчы і Ўкраіны будзе браць грамадзкае аб’яднаньне “Цэнтр “Трэці сектар” з Гародні. Удзельнікамі праекту стануць маладыя трэнэры з названых вышэй краін. На працягу 10 дзён яны будуць удасканальваць свае веды і ўменьні ў галіне распрацоўкі адукацыйных праграм для моладзі, авалодваць новымі мэтадамі трэнэрскай працы, абмяркоўваць магчымыя сумесныя праекты ў галіне нефармальнай адукацыі моладзі.

Дадатковай мэтай праекту зьяўляецца інтэграцыя моладзі з розных краін, нацыянальных і культурных асяродзьдзяў.

Гэта ўжо другі падобнага кшталту праект, які адбываецца з удзелам “Центру “Трэці сектар”. Летась на тэрыторыі Польшчы быў зладжаны беларуска-гішпанска-польска-ўкраінскі маадзёвы летнік, прысьвечаны ролі моладзі ў разьвіцьці мясцовых супольнасьцяў. Абодва згаданыя праекты атрымалі падтрымку ў межах Праграмы “Моладзь”, якая фінансуецца Эўрапейскім Зьвязам.

Вітаўт РУДНІК

Стартуе “Акадэмія першых”

Актывісты грамадзкіх арганізацыяў і ініцыятываў, якія працуюць з моладзьдзю, маюць магчымасьць узяць удзел у новым адукацыйным курсе “Акадэмія першых”. Мэтай курса зьяўляецца падрыхтоўка лідэраў і кіраўнікоў маладзёвых грамадзкіх аб’яднаньняў, здольных арганізоўваць сваю ўласную дзейнасьць, дзейнасьць сваіх арганізацыяў і дзейнасьць на ўзроўні сваіх мясцовых супольнасьцяў.

Арганізатарамі курсу зьяўляюцца Міжнароднае асьветніцкае грамадзкае аб’яднаньне “АКТ”, а таксама Беларускі саюз маладзёвых і дзіцячых грамадзкіх арганізацыяў “Рада”. Апошні тэрмін падачы заявак на ўдзел у курсе – 20 траўня да 16 гадзін.

Вітаўт РУДНІК

Навучаньне на дыстанцыі

Палепшыць сваю кампутарную пісьменнасьць змогуць удзельнікі новага дыстанцыйнага курсу “Асновы працы з электроннымі табліцамі”.

Мэтай курсу, які распачынаецца зь 1 чэрвеня, зьяўляецца вывучэньне асноваў працы з электроннымі табліцамі з дапамогай Microsoft Excel 2000.

Каб узяць удзел у курсе, неабходна зарэгістравацца па адрасе: http://distance.iatp.by Дадатковую інфармацыю можна атрымаць па электроннай пошце, зьвярнуўшыся па адрасе:

Вітаўт Руднік

Круглае возера-2005

Традыцыйны летні інтэграцыйны летнік-сэмінар у намётах ладзіць сёлета грамадзкае аб’яднаньне “Розныя-Роўныя”.

Летнік пад назвай “Круглае возера-2005” будзе базавацца зь 10 да 20 ліпеня на беразе Плешчаніцкага вадасховішча. Удзельнікамі мерапрыемства будуць маладыя людзі ўва ўзросьце ад 18 да 31 году з абмежаванымі фізычнымі магчымасьцямі і бязь іх.

Апошні тэрмін падачы заявак на ўдзел у мерапрыемстве – 25 чэрвеня.

Вітаўт РУДНІК

Вечар беларускай і швэдзкай паэзіі

Аматары і аматаркі паэзіі запрашаюцца на вечар беларускай і швэдзкай паэзіі і літаратуры. Арганізатарамі сустрэчы выступілі Швэдзкі інстытут (Svenska instiutet), Стакгольм, разам з філялягічным факультэтам Гарадзенскага дзяржаўнага ўнівэрсытэту імя Янкі Купалы. У праграме заплянаваныя літаратурныя чытаньні беларускіх і швэдзкіх аўтараў.

Літаратурны вечар у Гародні зьяўляецца часткай праграмы дзён швэдзка-беларускай паэзіі і літаратуры. Гэтаксама былі заплянаваныя сустрэчы 19 траўня ў Менску і 21 траўня ў Пінску. Вечар у Гародні адбудзецца 21 траўня па адрасе: актавая заля корпусу філялягічнага факультэту ГарДУ па вул. Леніна, 32.

Уваход вольны.

Падрыхтавала АЛЕСЯ БЯЛЕНІК

Свабода мэдыя – у цэнтры ўвагі

12-13 траўня ўва Ўроцлаве (Польшча) адбываўся ІІ Міжнародны фэстываль мэдыя, на які, у якасьці ганаровых удзельнікаў, былі запрошаныя беларускія і ўкраінскія журналісты. Ад Беларусі ўдзел у мерапрыемстве ўзялі гарадзенскія журналісты, сябры мясцовай філіі ГА “Беларуская асацыяцыя журналістаў”.

Праграма фэстывалю ўключала ў сябе трэнінгі і практычныя заняткі з удзелам вядомых польскіх журналістаў, візыты ў рэдакцыі мясцовых газэт, канфэрэнцыю, дэбаты пра ролю і значэньне студэнцкіх СМІ і выставы фатаздымкаў.

Другая частка фэстывалю прайшла ў Любіне – нефармальнай сталіцы польскага пазацэнзурнага друку ў часы “стану ваеннага”. Тут адбылася прэзэнтацыя выставы “Любін – польскія сутарэньні незалежнага друку” і аднайменнага дакумэнтальнага фільму, падрыхтаваных студэнтамі мясцовага факультэту журналістыкі. Таксама адбыліся прэс-канфэрэнцыя і дэбаты на тэму “Незалежная прэса ў таталітарнай дзяржаве”.

Валера РУСЕЛІК

Беларусь ува “Ўсходнім Экспрэсе”

9-14 красавіка ў невялікім горным мястэчку Чыста Папрычка (?ista Papri?ka) (Славаччына) адбываўся Міжнародны трэнінг для маладых лідараў з краін Усходняй Эўропы і Каўказу “Усходні Экспрэс”.

Удзел у мерапрыемстве ад Беларусі ўзяло ГА “Цэнтр “Трэці сектар”. Мэтай трэнінгу было знаёмства маладых лідараў акрэсьленага рэгіёну міжсобку і з Праграмай “Action1 – Маладзёвыя абмены”, навязваньне супрацоўніцтва паміж патэнцыйна партнэрскімі арганізацыямі-ўдзельніцамі “Ўсходняга Экспрэсу”, а таксама стымуляваньне распрацоўкі сумесных праектаў у межах Праграмы.

Арганізатарамі трэнінгу выступілі SALTO-YOUTH Усходняй Эўропы, Каўкаскі рэсурсовы цэнтар сумесна з Славацкай нацыянальнай агенцыяй Праграмы “Моладзь” IUVENTA-NAFYM.

Валера РУСЕЛІК

Дабрачынны канцэрт «Бацькаўшчыны»

Дабрачынны канцэрт хору беларускай духоўнай “Бацькаўшчына” адбыўся 5 траўня ў Гародні. Выступ хора адбываўся ў лютэранскай кірсе, на аднаўленьне якой і пойдуць сабраныя ў час канцэрта ахвяраваньні.

У чэрвені “Бацькаўшчына” возьме ўдзел у Фэстывалі беларускай культуры ўва Ўроцлаве (Польшча).

Вітаўт РУДНІК