Адкрыццё выставы “Рускі жывапіс XIX–XX стагоддзяў”

У экспазіцыю ўвойдуць больш за сто твораў рускага жывапісу XIX–XX стагоддзяў такіх майстроў, як Васіль Пяроў, Іван Айвазоўскі, Ілья Рэпін, Ісаак Левітан, Віктар Васняцоў, Канстанцін і Уладзімір Макоўскія, Аляксандр Бенуа, Мсціслаў Дабужынскі, Натан Альтман, і гэта далёка не поўны пералік вядомых імёнаў. Сярод іх – аўтарскія варыянты знакамітых твораў, у тым ліку «Бярозавы гай» А. Куінджы, «Віцязь на ростанях» В. Васняцова, «Міраж у стэпе» П. Кузняцова, «У акне» Б. Кустодзіева. Ёсць у калекцыі і творы жывапісцаў, якія належалі да таварыства «Голубая роза», М. Сапунова, П. Кузняцова, М. Сар’яна, А. Фанвізіна, а таксама працы ўдзельнікаў «Бубновага валета». І вядома ж, важнае месца займаюць у калекцыі Валадчынскага творы майстроў, так ці іначай звязаных з роднай для яго Беларуссю, дзе нарадзіліся А. Гараўскі і Г. Баброўскі, В. Бялыніцкі-Біруля і С. Жукоўскі.

Калекцыя Аляксандра Навумавіча Валадчынскага будзе цікавай як для шырокага кола аматараў, так і знаўцам мастацтва.

Куратар выставы: Харак Аляксей Пятровіч, загадчык аддзела рускага і замежнага мастацтва Нацыянальнага мастацкага музея Рэспублікі Беларусь