Базы дадзеных

Грамадcкія аб’яднанні, Фонды, Праекты, Маніторынг, Прэса

Трэці сектар

Навіны, Мэнэджмэнт, Некамерцыйнае права, Праграмы і конкурсы

Аб'яднаны шлях

Пра нас, Выданні, Праграмы, Лінкі і банеры, Кантакты

ngo.by → Маніторынг беларускай прэсы → Звязда

Бізнэс прапанаваў сваю праграму пераадолення крызісу

№95(26968)25.05.11Планшэты для міністраў і зямельныя сертыфікаты пенсіянерам

Адкрыты ліст з мерамі па пераадоленні крызісу ў сферы валютнага рэгулявання падпісалі і адправілі ва ўрад і Нацбанк кіраўнікі вядучых бізнэс-аб'яднанняў Беларусі — Беларускай навукова-прамысловай асацыяцыі, Мінскага сталічнага саюза прадпрымальнікаў і працадаўцаў, Беларускага саюза прадпрымальнікаў, Рэспубліканскага саюза наймальнікаў "БелСН", Рэспубліканскай канфедэрацыі прадпрымальніцтва.
У лісце адзначаецца, што "нявызначанасць у пытаннях валютнага рэгулявання, якая зацягнулася, парушае вытворча-гаспадарчую дзейнасць і падрывае дзелавую рэпутацыю ўжо не толькі асобных суб'ектаў гаспадарання, але практычна ўсіх галін эканомікі краіны ў цэлым", што "ўсё гэта правакуе павелічэнне выдаткаў на прадукцыю (работы, паслугі), што прыводзіць да росту цэн на ўсіх таварных рынках, адбіваецца на даходах працоўных, усіх грамадзян", а таксама што такая нявызначанасць "узмацняе пагрозу эканамічнай бяспекі краіны".
У сувязі з гэтым бізнэс-асацыяцыі прапануюць кіраўніцтву краіны 16 пунктаў з мерамі, якія, на думку прадстаўнікоў беларускага бізнэсу, дапамогуць пераадолець крызіс у сферы валютнага рэгулявання, а таксама зробяць мінімальнымі яго наступствы для эканомікі і насельніцтва. Цікава, што прадпрымальнікі як у ваду глядзелі — першы пункт гучыць як "Неадкладна вызначыцца і прыняць меры па дэвальвацыі нацыянальнай валюты ў мэтах умацавання яе стабільнасці". Як бачым, гэты пункт аказаўся выкананым практычна ў момант падпісання ліста — з 24 мая Нацбанк ужо усталяваў новыя курсы валют.
У наступныя пятнаццаць пунктаў уваходзяць і прапановы прыняць дакладную праграму жорсткай эканоміі, ажыццявіць рэальныя меры па прыцягненні і павышэнні эканамічнай эфектыўнасці інвестыцый, паскорыць правядзенне экспертызы дзяржпраграм, зрабіць крокі па прыцягненні знешніх запазычанняў, дакладна вызначыць і неадкладна ажыццявіць канкрэтныя крокі і меры па рэфармаванні ў эканоміцы, вызначыць меры для стымулявання грамадзян і арганізацый да назапашванняў у нацыянальнай валюце, зняць усе адміністрацыйныя абмежаванні на продаж айчынных тавараў прадпрымальнікам для вывазу на экспарт, узмоцніць кантроль за сферай дзяржзакупак і іншыя
Самай апошняй ідзе прапанова з прыцягненнем спецыялістаў Парка высокіх тэхналогій тэрмінова стварыць сітуацыйны (які дзейнічае ў рэжыме рэальнага часу) электронны планшэт для кіраўніцтва і галоўных эканамічных ведамстваў краіны, каб яны бачылі рэальную інфармацыю і кароткатэрміновы прагноз па сальда даходнай і расходнай частак бюджэту і прымалі аператыўныя рашэнні і своечасовыя меры па іх карэкціроўках у мэтах жорсткага балансу расходаў краіны, галін эканомікі і рэгіёнаў з даходамі.
Пра тое, якім атрымаўся першы крок і што трэба рабіць далей, мы пацікавіліся ў старшыні ГА "МССПіП" Уладзіміра Карагіна:
— Дэвальвацыя — гэта першы крок, але далёка не ўвесь пакет мер, якія трэба зрабіць. Бо калі правесці толькі дэвальвацыю і пакінуць усё як ёсць, то праз паўгода ці праз 8 месяцаў прыйдзецца яшчэ адну дэвальвацыю праводзіць. Без поўнага пакета мер па мадэрнізацыі эканомікі, змянення метадаў кіравання нічога не будзе. Таму цяпер як ніколі актуальныя нашы прапановы, сфармуляваныя ў Нацыянальнай платформе бізнэсу Беларусі — яны набываюць яшчэ большую актуальнасць і значнасць. І толькі робячы стаўку на развіццё прадпрымальніцтва і ініцыятывы, а таксама прыняўшы іншыя меры ў комплексе, можна дасягнуць эфекту.
Уладзімір Карагін мяркуе, што перш за ўсё трэба ліквідаваць прычыны, якія прывялі нас да валютнага крызісу — адмоўнае гандлёвае сальда, дыспрапорцыі на спажывецкім рынку рэспублікі:
— Трэба ліквідаваць гэтыя карэнныя прычыны, бо інакш ўсё будзе працягвацца па-ранейшаму. Краіне патрэбны эфектыўны і адказны ўласнік, таму трэба не прадаваць маёмасць нейкаму замежнаму далёкаму ўладальніку, а рабіць стаўку на ўласных прадпрымальнікаў. Зрабіць гэта можна праз перадачу ў давернае кіраванне прадпрыемстваў, якія неэфектыўна працуюць, з наступным выкупам гэтых прадпрыемстваў з часткі іх прыбытку. Бо інакш у нас не будзе беларускіх уласнікаў прадпрыемстваў. Гэта магістральны шлях, на які сёння пакуль не могуць асмеліцца. А зараз якраз самы час абаперціся на эфектыўнага ўласніка. Дарэчы, калі мы вывучалі прычыны дэфіцыту гандлёвага балансу, то мы ўбачылі, што ў геаметрычнай прагрэсіі вырастаў прамежкавы імпарт у першую чаргу на дзяржпрадпрыемствах. Чаму? Бо гэта не ўласнікі, гэта наёмныя менеджары, якія хочуць да зарплаты яшчэ дадаць суму адкатаў і розных бонусаў ад замежных рэгуліроўшчыкаў.
Таксама Уладзімір Мікалаевіч перакананы, што дзяржава мусіць кампенсаваць насельніцтву страты ад праведзенай дэвальвацыі:
— Народ у шоку зараз — мне знаёмыя пенсіянеры тэлефануюць і пытаюць: "А што, наша пенсія фактычна ў два разы па пакупніцкай здольнасці ўпала?". Таму цяпер ніяк нельга абысціся без механізму кампенсацыі. Мы лічым, што зараз неабходна ўвесці такое паняцце, як "зямельны сертыфікат" — і ўклады ў банках, і пенсіі надзяліць пэўным вартасным напаўненнем. Мы вельмі багатыя зямлёй, таму трэба запусціць у абарачэнне не паветра, а рэальны актыў, які сёння ляжыць мёртвым грузам. Гэта і маральна, і матэрыяльна кампенсуе людзям страты, яны зразумеюць, што дзяржава клапоціцца пра іх. Трэба зрабіць, каб гэтыя каштоўныя паперы можна было і захоўваць у банку, і прадаваць — нешта накшталт чэкаў "Маёмасць". Гэта ўзмоцніць і рынак каштоўных папер, і створыць кампенсацыйны механізм — нельга ж спачатку залезці людзям у кішэню, а потым нічога не даць узамен.
Сваю думку на гэты конт "Звяздзе" выказаў і Аляксандр Швец старшыня РГА "БНПА":
— Я мяркую, што Нацыянальнаму банку як рэгулятару ў валютнай сферы, трэба пачаць рэгуляваць. І тое, што ён пачаў рэгуляваць, падымаючы курс, — гэта толькі пачатковы крок. Каб прывесці валютны рынак у працоўны стан, трэба яшчэ цэлы шэраг крокаў, зрабіць якія мы (з нашага пункту гледжання) і агучылі ў адкрытым лісце.
Мы лічым, што ўтрымліваць рэальны курс на ўзроўні 4930 без валютнай інтэрвенцыі з боку рэгулятара Нацыянальнаму банку будзе вельмі цяжка. Бо я не думаю, што ў экспарцёраў, якія прадавалі валюту па курсе 7000-8700, з'явіцца жаданне прадаваць яе па 5 тысяч. Таму я мяркую, што экспарцёры будуць утрымліваць валюту, і нам будзе вельмі цяжка забяспечыць адэкватную прапанову валюты, якая б адпавядала попыту.
Наконт магчымай рэакцыі на адкрыты ліст Аляксандр Швец сказаў, што ніякіх асаблівых ілюзій бізнэс не мае, але лічыць патрэбным выказацца:
— Ілюзій наконт таго, што адразу пачнуць прыслухоўвацца да нас, мы не маем, але лічым сваім доўгам выказаць экспертную пазіцыю БНПА, бо ў склад нашай асацыяцыі ўваходзяць вельмі паважаныя людзі. Наша грамадзянская пазіцыя — рабіць свае прапановы, якія носяць абсалютна сяброўскі і канструктыўны характар.
Павел Бераснеў.
26 траўня 2011

Маніторынг беларускай прэсы

Праграмы, конкурсы, вучоба
Міністэрства юстыцыі інфармуе
Адказы на пытанні
Некамерцыйнае права

Інфармацыя на партале не з'яўляецца афіцыйнай пазіцыяй БРГА «Аб'яднаны шлях».
Адміністрацыя партала можа не падзяляць думкі аўтараў размешчаных матэрыялаў.

© БРГА «Аб’яднаны шлях», 2003—2010
Пры выкарыстанні матэрыялаў партала спасылка на крыніцу абавязкова.