І сонечная батарэя на даху
№ 3 (27613)10.01.14.Праз два гады ў трох гарадах Беларусі з’явяцца шматпавярховыя жылыя дамы з сонечнымі батарэямі. Аб гэтым паведалі беларускія навукоўцы на міжнароднай канферэнцыі, прысвечанай энергаэфектыўным будынкам.
Прагназуецца, што першыя энергаэфектыўныя дамы з аднаўляльнымі крыніцамі энергіі такога класа будуць пабудаваны ў Мінску, Гродне і Магілёве. Як адзначыў на форуме дырэктар інстытута жылля — НДПТІБ імя Атаева Уладзімір Піліпенка, Беларусь першая з краін СНД, якая пачала будаўніцтва энергаэфектыўных дамоў. Сёння ў нашай краіне ўжо 15 такіх аб’ектаў. А вось дамы з аднаўляльнымі крыніцамі энергіі будуць пабудаваны ўпершыню. Пілотныя жылыя будынкі будуць абсталяваны сонечнымі калектарамі (геліяўстаноўкі для падагрэву вады) і сонечнымі батарэямі (выпрацоўка «сонечнай» электраэнергіі).
Праўда, у нашых шыротах найбольшы эфект даюць не геліяўстаноўкі, а грунтавыя цеплавыя помпы, якія выкарыстоўваюць зямлю ў якасці крыніцы цяпла, а таксама як ахаладжальнік у летні час. І такое абсталяванне прадугледжваецца праектамі ў новых будынках. Будаўніцтва шматпавярховак будзе рэалізавана ў межах пілотнага праекта, які ажыццяўляе ў краіне Праграма развіцця ААН (ПРААН) і Глабальны экалагічны фонд (ГЭФ). Усе тры дамы будуць узведзены дзяржаўнымі забудоўшчыкамі (такімі, як МАПІД і «Гроднаграмадзянпраект») для беларусаў, якія маюць патрэбу ў паляпшэнні жыллёвых умоў. У Гродне і Мінску завершана стадыя архітэктурнага праектавання пілотных дамоў, а ў Магілёве ідуць перадпраектныя работы, паведаміў кіраўнік праекта ПРААН Аляксандр Грабянькоў.
Адным з галоўных недахопаў гелія- і геатэрмальных сістэм з’яўляецца высокі кошт першапачатковых капітальных укладанняў. Падлічана, што капітальныя і эксплуатацыйныя выдаткі гэтых дамоў будуць на 10-15% вышэй, чым па базавым будаўніцтве. Менавіта гэтую розніцу і прафінансуе праект ПРААН і ГЭФ. Відавочна, што галоўнай задачай пілотнага праекта будзе маніторынг рэальных выдаткаў на будаўніцтва і эксплуатацыю падобных аб’ектаў, а канчатковай мэтай узвядзення энергаэфектыўных будынкаў — істотнае зніжэнне спажывання энергіі пры эксплуатацыі, а таксама скарачэнне выкідаў парніковых газаў у атмасферу. Прасцей кажучы, новыя тэхналогіі дазволяць паменшыць суму ў жыроўках беларусаў і зберагчы наша здароўе ад забруджанага паветра.
Сяргей Куркач