Базы дадзеных

Грамадcкія аб’яднанні, Фонды, Праекты, Маніторынг, Прэса

Трэці сектар

Навіны, Мэнэджмэнт, Некамерцыйнае права, Праграмы і конкурсы

Аб'яднаны шлях

Пра нас, Выданні, Праграмы, Лінкі і банеры, Кантакты

ngo.by → Маніторынг беларускай прэсы → Звязда

Як і сто гадоў таму — каб не прапасці ў агні

№ 6 (26870) 13.01.11 Аказваецца, так званаму Вольнаму пажарнаму таварыству ў Брэсце больш за сто гадоў. У ХІХ стагоддзі горад моцна цярпеў ад пажараў. Найбольш жорсткія і ахвярныя з іх здараліся ў 1802, 1822, 1828, 1835 гадах. Не пакінула гэтая навала горад і пазней. І вось у 1897 годзе кіраўніцтва горада заснавала названае вышэй таварыства. Мецэнаты ахвяроўвалі сродкі, гараджане арганізоўвалі пажарныя каманды.

Традыцыя дажыла да нашых дзён. Сваё ўвасабленне яна мае ў цяперашнім рэспубліканскім дзяржаўна-грамадскім аб'яднанні "Беларускае добраахвотнае пажарнае таварыства". Цяпер гэта, вядома, іншая арганізацыя, чым была стагоддзе таму. Яна мае свае прадпрыемствы, вытворчасцю разнастайнага супрацьпажарнага абсталявання і іншых тавараў зарабляе грошы. Але галоўная мэта аб'яднання, як і сто гадоў таму — навучаць людзей бяспецы, дапамагаць захоўваць меры прафілактыкі.
Нядаўна на канферэнцыі быў абраны новы старшыня савета Брэсцкай абласной арганізацыі Ігар Аўсянік. Ігар Анатольевіч шмат гадоў праслужыў у сістэме МНС, мае вопыт работы ў гарадскім Савеце дэпутатаў. Таму яго кандыдатуру таварышы па арганізацыі падтрымалі амаль аднадушна. Удзельнікі сходу абмяняліся думкамі наконт паляпшэння сваёй работы і шляхоў развіцця арганізацыі.
 
Валерый Астапаў, старшыня Рэспубліканскага савета добраахвотнага пажарнага таварыства сказаў, што дзяржаўна-грамадская арганізацыя не карыстаецца ніякімі датацыямі з бюджэту:
— Што можам, тое і зарабляем. Хоць ва ўмовах рынку пры жорсткай канкурэнцыі годна выглядаць у эканамічным плане робіцца ўсё больш складана, лічым сваім абавязкам кожны год не менш за 10-15% ад прыбытку накіроўваць на арганізацыю прафілактычных мерапрыемстваў. Актывісты БДПТ не толькі праводзяць прапагандысцкія і асветніцкія мерапрыемствы, але і аказваюць шэраг адпаведных паслуг насельніцтву, устанаўліваюць пажарныя апавяшчальнікі ў якасці дапамогі ветэранам вайны, састарэлым, адзінокім людзям, шматдзетным сем'ям.
Новы старшыня абласнога савета Ігар Аўсянік акрэсліў свае бліжэйшыя планы так:
— Найперш трэба ўмацаваць структуры нашага таварыства ў кожным раёне. А потым працаваць з канкрэтнымі камандамі прадпрыемства, сельсавета, СВК. Трэба, каб добраахвотных пажарных каманд было як мага больш. Людзі, якія ўваходзяць у гэтыя фарміраванні, як правіла, годна паводзяць сябе ў экстрэмальнай сітуацыі. Сёння мы можам ганарыцца ўчынкам нашага актывіста, лесніка Гарадзішчанскага лясніцтва Баранавіцкага лясгаса Мікалая Сташэўскага. Ён бясстрашна ўвайшоў у палаючы дом аднавяскоўца і выцягнуў з пажару гаспадара. А зусім нядаўна, у снежні мінулага года, добраахвотнікі СВК "Рубельскі" Столінскага раёна выратавалі у начным пажары адразу двух чалавек.
Начальнік Брэсцкага абласнога МНС Канстанцін Шаршуновіч выказаў сваю пашану арганізацыі, якая праводзіць вялікую работу па прафілактыцы пажараў і навучанню насельніцтва азам бяспечных паводзін у сваім штодзённым жыцці.
Святлана Яскевіч
 
14 студзеня 2011

Маніторынг беларускай прэсы

Праграмы, конкурсы, вучоба
Міністэрства юстыцыі інфармуе
Адказы на пытанні
Некамерцыйнае права

Інфармацыя на партале не з'яўляецца афіцыйнай пазіцыяй БРГА «Аб'яднаны шлях».
Адміністрацыя партала можа не падзяляць думкі аўтараў размешчаных матэрыялаў.

© БРГА «Аб’яднаны шлях», 2003—2010
Пры выкарыстанні матэрыялаў партала спасылка на крыніцу абавязкова.