Базы дадзеных

Грамадcкія аб’яднанні, Фонды, Праекты, Маніторынг, Прэса

Трэці сектар

Навіны, Мэнэджмэнт, Некамерцыйнае права, Праграмы і конкурсы

Аб'яднаны шлях

Пра нас, Выданні, Праграмы, Лінкі і банеры, Кантакты

ngo.by → Маніторынг беларускай прэсы → Звязда

Хочаш стаць валанцёрам?

№ 20 (26884) 02.02.11 Праца зрабіла некалі з малпы чалавека. Адсюль выснова: праца — гэта самы каштоўны скарб чалавецтва. Асабліва, калі яна прыносіць карысць. Таму валанцёрства — вельмі ганаровы занятак. І ён добра падыходзіць для маладых, сумленных, мэтанакіраваных, працавітых хлопцаў і дзяўчат. Менавіта такіх чакаюць у "Лізе добраахвотнай працы моладзі".

Што ёсць Ліга?
 
Гэта Рэспубліканская моладзевая грамадская арганізацыя, заснаваная ў 1994 годзе. З'яўляецца членам Каардынацыйнага камітэта Міжнародных арганізацый добраахвотнай працы (ССІVS) і Альянса еўрапейскіх арганізацый добраахвотнай працы. Мае партнёраў больш як у 35 краінах свету. У праектах Лігі штогод прымаюць удзел больш як 5000 чалавек.
 
Валанцёрскія праграмы
 
"Можна сказаць, што ў нас дзве асноўныя вялікія праграмы: студэнцкі педагагічны атрад "Rеsпубліка" і Міжнародныя валанцёрскія лагеры. Першая дае магчымасць папрацаваць у складзе атрада ў якасці важатага, выхавальніка, арганізатара культурна-масавых мерапрыемстваў у дзіцячым аздараўленчым лагеры. Ужо зараз праходзіць набор пачаткоўцаў (працягвацца ён будзе да 1 лютага), каб да красавіка яны былі падрыхтаваны. Плануецца адправіць каля 600 чалавек. Другая складаецца з некалькіх праектаў: ёсць кароткатэрміновыя праграмы (на два-тры тыдні), сярэднетэрміновыя (на месяц у Францыю) і доўгатэрміновыя (гадавы праект у Германіі)", — расказвае Вольга Шмігельская, старшыня праўлення Лігі. Усе гэтыя праграмы — летнія. Зімовыя — нямэтазгодныя, бо ў нас няма канкрэтна вызначаных для ўсіх універсітэтаў канікулаў.
"Галоўнае патрабаванне да валанцёраў — узрост ад 18 гадоў і веданне замежных моў для міжнародных праграм, — запэўнівае Вольга. — Да таго яшчэ патрэбна правільная матывацыя: каб чалавек, напрыклад, разумеў, што ён не адпачываць едзе, а працаваць. Давядзецца напружвацца, стамляцца. Але галоўны набытак пасля гэтага — новыя ўражанні і шмат сяброў, бо зарабіць таксама асабліва не атрымаецца: грошы хоць і плацяць, але вельмі невялікія". Дарэчы, праезд трэба аплачваць таксама самому валанцёру (выключэнне: сярэднетэрміновыя і доўгатэрміновыя праекты). А вось ежа і пражыванне аплачваюцца (толькі не разлічвайце на асаблівы шык). 
яшчэ: хлопцаў-валанцёраў менш, чым дзяўчат. Таму, хлопцы, актыўней, не адставайце ад дзяўчат!.
 
Акадэмія важацкага майстэрства
 
Гэта "навучальная ўстанова", якая дзейнічае ў Лізе. Там навучаюць тым рэчам, якія могуць потым спатрэбіцца пры працы ў лагеры. Адукацыя складаецца з трох ступеняў: школа важатых (для пачаткоўцаў), Fаnсу-студыі (розныя гульні і "рамёствы"), майстар-класы (сакрэты майстэрства ад старэйшых калег).
Якога кшталту бываюць валанцёрскія лагеры?
Тут мы маем, так скажам, поўны асартымент:
 сацыяльныя (праца з дзецьмі, інвалідамі і састарэлымі людзьмі);
 экалагічныя (высадка дрэў, кветак, уборка смецця і інш.);
 рэстаўрацыйныя (напрыклад, пафарбаваць сцены ў якімсьці памяшканні);
 музычныя/тэатральныя (аматарскія, але шмат крэатыву).
 
З першых вуснаў
 
Студэнтка 5 курса лінгвістычнага ўніверсітэта Алена Сырамятнікава ўжо некалькі разоў прымала ўдзел у праграмах Лігі. Яна вельмі хацела пабываць у Францыі і здзейсніла сваю мару дзякуючы менавіта Лізе. "Увогуле мне вельмі падабаецца атмасфера ў гэтай арганізацыі. Я цяпер у школе важатых "выкладаю". Навучанне ідзе па прынцыпе: "Роўны навучае роўнага". Там заўсёды так. І калі ў чалавека ёсць жаданне, то там яму дапамогуць знайсці ў сабе тое, што ён зможа аддаць у якасці валанцёра".
Р.S.
Калі ты захацеў стаць валанцёрам, заходзь на сайт Лігі http://lyvs.bn.by/ . Там ты знойдзеш больш падрабязную інфармацыю. Набор на некаторыя праекты ўжо ідзе.
Уладзіслаў Кулецкі.
 
 
3 лютага 2011

Маніторынг беларускай прэсы

Праграмы, конкурсы, вучоба
Міністэрства юстыцыі інфармуе
Адказы на пытанні
Некамерцыйнае права

Інфармацыя на партале не з'яўляецца афіцыйнай пазіцыяй БРГА «Аб'яднаны шлях».
Адміністрацыя партала можа не падзяляць думкі аўтараў размешчаных матэрыялаў.

© БРГА «Аб’яднаны шлях», 2003—2010
Пры выкарыстанні матэрыялаў партала спасылка на крыніцу абавязкова.