«Простыя рэчы» гасціннасці
№ 30 (27640)18.02.14.Беларускае грамадскае аб’яднанне «Адпачынак у вёсцы» ў рамках праекта USAІD/ПРААН «Мясцовае прадпрымальніцтва і эканамічнае развіццё» праводзіць інфармацыйна-адукацыйную кампанію «Простыя рэчы», каб папулярызаваць аграэкатурызм як бізнес і адпачынак.
— 2014-ы аб’яўлены ў Беларусі Годам гасціннасці. І дзе, як не ў нашай вёсцы, можна адчуць сапраўдную беларускую гасціннасць? Менавіта на простых і спрадвечных каштоўнасцях заснаваны аграэкатурызм: фальклор, рамёствы, абрады, ежа і, вядома ж, душэўнасць і гасціннасць нашых людзей. Перш за ўсё мы хацелі б нагадаць суайчыннікам, і не толькі ім, што ў Беларусі, у нашай глыбінцы, можна добра і цікава адпачываць. І, акрамя таго, ствараць тут свой бізнес. Гэта цудоўная тэма для самарэалізацыі і прадпрымальніцтва (аграсядзібы, кавярні, зялёныя маршруты, пракат байдарак і веласіпедаў, рамесніцтва і г. д.), — кажа старшыня праўлення аб’яднання «Адпачынак у вёсцы» Валерыя Кліцунова.
У рамках кампаніі «Простыя рэчы» цяпер распрацоўваецца серыя сацыяльных плакатаў, прысвечаных розным аспектам аграэкатурызму, якія будуць размешчаны ў гарадах нашай краіны. Плануецца арганізацыя валанцёрскіх груп сярод студэнтаў ВНУ і каледжаў для працы на аб’ектах аграэкатурызму, «Летніка рамёстваў», правядзенне экалагічных акцый з прыцягненнем дзяцей і моладзі, канферэнцыі «Творчая лабараторыя зялёнага турызму». Таксама пройдзе фестываль Organіc party («Зялёнае свята»), прысвечаны традыцыйнай кухні, якая заснавана на экалагічных прадуктах, і пытанням менеджменту, сертыфікацыі агратурыстычных аб’ектаў у гэтай сферы.
Той, хто зацікавіўся кампаніяй «Простыя рэчы», можа паведаміць пра гэта па адрасе і
[email protected].
Барыс Пракопчык.