Валанцёры — людзі, якія трымаюць свет
№ 9 (27619) 18.01.14..Міласэрнасць не патрабуе «паперак»
Многія гатовыя прыйсці на дапамогу блізкаму, і сама па сабе такая з’ява, як валанцёрская дзейнасць, у нас існуе. Але ў тым і справа, што — сама па сабе… Ніяк заканадаўча яна не аформлена, і часам гэта выклікае спрэчкі. Бо, з аднаго боку, дзейнасць добраахвотніка ніхто не кантралюе (а часам бывае і такое, што валанцёры могуць нанесці шкоду), а з другога боку, ён не мае ніякіх сацыяльных гарантый.
Напрыклад, чалавек дапамагае праводзіць археалагічныя раскопкі альбо аднаўляць помнік архітэктуры. І здараецца так, што падчас працы валанцёр атрымлівае фізічную траўму. Пры гэтым з пункту гледжання заканадаўства гэты чалавек увогуле не павінен быў праводзіць там нейкія работы без дакументальнага дазволу на гэта. Таму за здароўе валанцёра ў такіх выпадках адказнасць нясе толькі ён сам. Яшчэ адзін істотны момант: прафпрыдатнасць валанцёра да таго ці іншага віда дзейнасці ніхто пацвердзіць не можа.
Каб хоць неяк рэгуляваць сітуацыю, многія валанцёрскія арганізацыі ў Беларусі прапануюць стварыць адзіны пашпарт валанцёра. Такія ўжо ёсць, напрыклад, у Маскве. Існуюць нават спецыяльныя банкаўскія карткі для валанцёраў, пры разліку якімі можна атрымліваць зніжку ў краме. Больш за тое, для абітурыентаў і студэнтаў, якія займаюцца добраахвотніцкай дзейнасцю, уведзены льготы пры паступленні ў ВНУ і размеркаванні на працу. Звычайная практыка за мяжой: для таго, каб паступіць ва ўніверсітэт на спецыяльнасць, звязаную з сацыяльным абслугоўваннем, абітурыент мусіць год папрацаваць валанцёрам. Такі падыход забяспечвае прыход у сацыяльную сферу не «выпадковых» людзей, а тых, хто можа аддаць душу і сэрца сваёй справе.
Што да заканадаўчага зацвярджэння статусу валанцёра, у нас пакуль што мала хто пра гэта задумваецца. Праўда, на думку некаторых, закон аб валанцёрстве неабходны, бо дазволіць сістэматызаваць добраахвотніцкую дзейнасць і дапаможа вырашыць многія сацыяльныя праблемы. А хтосьці лічыць, што гэта прынясе толькі лішнюю бюракратычную «цяганіну» і абмежаванні ў аказанні дапамогі. Але пры неабходнасці для доўгатэрміновага супрацоўніцтва можна заключыць дагавор з валанцёрам, такі дакумент будзе рэгуляваць пэўныя моманты яго дзейнасці. Магчыма, у гэтым ёсць рацыя: каб рабіць дабро, патрэбны зусім не стос зацверджаных «паперак», а любоў да блізкіх і міласэрнасць.
«Не магу думаць толькі пра свой камфорт»
Хтосьці лічыць валанцёраў «звышлюдзьмі», хтосьці нярэдка сумняваецца ў іх «нармальнасці», маўляў, які адэкватны чалавек будзе без усялякай узнагароды дапамагаць іншым, калі ў самога праблем поўны рот? Але насамрэч яны — звычайныя людзі, якія жывуць сярод нас. Проста сэрцы ў іх чуллівыя да чужой нястачы. Карэспандэнт «Звязды» знайшла тых, хто значную частку свайго жыцця прысвячае валанцёрскай справе, і пераканалася: рабіць дабро можа кожны з нас.
Айцец Антон, грэка-каталіцкі святар з Мінска, даўно займаецца дабрачыннай дзейнасцю, але пры гэтым заўважае, што яго «не хапае» на ўсіх.
— Маё валанцёрства звязана з верай. Я хрысціянін і не магу жыць, думаючы толькі пра свой камфорт. Заўсёды памятаю пра тых, каму цяжка, хто засмучаны, хто плача, каму патрэбна дапамога і суцяшэнне. Вось ужо некалькі месяцаў мы з сябрамі наведваем сацыяльна-педагагічны цэнтр з прытулкам Фрунзенскага раёна. Дзеці надзвычай адкрытыя, і адчуванні падчас візітаў да іх вельмі пазітыўныя. Дзеткі даюць зарад бадзёрасці і радасці. Так што хочацца да іх яшчэ прыходзіць.
Мне здаецца, малеча найбольш цэніць не падарункі, якія шмат хто дорыць, асабліва на Новы год, а пастаянную ўвагу, калі мы наведваем іх кожны тыдзень, каб паразмаўляць, спытаць, як іх справы, правесці добра час. Калі ёсць магчымасць, то стараемся падрыхтаваць для іх якую-небудзь праграму. Або проста размаўляем, гуляем у гульні, малюем разам.
Уражвае, як дзеткі, асабліва меншыя, сустракаюць, абдымаюцца і, калі сыходзіш, праводзяць да самых дзвярэй і туляцца да цябе. Відаць, што ім не хапае любові.
Асаблівых складанасцяў падчас валанцёрства не ўзнікае. Праўда, часам няпроста бывае знайсці моладзь на дапамогу, бо даволі цяжка, калі ты адзін на 5—10 дзетак.
«Усё часцей чуем «так»
А старшы выкладчык кафедры сурдапедагогікі і кафедры педагогікі і псіхалогіі няспыннай адукацыі пры Інстытуце павышэння кваліфікацыі і перападрыхтоўкі кадраў БДПУ імя М. Танка, маці дваіх дзяцей Святлана Пятроўская ўжо чацвёрты год дапамагае людзям з асаблівасцямі псіхафізічнага развіцця.
— Пры наведванні адной з закрытых устаноў інтэрнатнага тыпу давялося назіраць, як мае маладыя калегі, якія яшчэ не абдымалі сваіх дзяцей, у прамым сэнсе слова падкладваюць рукі пад ляжачых хворых, кормяць іх, вывозяць на прагулку, як шчасліва гараць вочы ва ўсіх. Я зразумела, што не падтрымаць гэтага нельга.
Цяпер валанцёрская работа на базе факультэта спецыяльнай адукацыі БДПУ пашырылася і праводзіцца ў межах гарадскога валанцёрскага цэнтра «Міладара». Наша асноўная задача — садзеянне развіццю інклюзіі, пашырэнне эмацыйнай і фізічнай прасторы для нашых падапечных. Камусьці можа здацца дзіўным, але наша супрацоўніцтва ўзаемна ўзбагачае: пры сустрэчах з сябрамі (менавіта так мы называем тых, каму аказваем дапамогу) атрымліваеш такі зарад шчырасці, любові, адкрытасці, разумення, якога хапае на многія месяцы цёплых успамінаў. Хоць на пачатку нашай дзейнасці ўзнікала пачуццё няёмкасці, калі мы хацелі наведаць з асаблівымі людзьмі грамадскія месцы, а нам адказвалі «У нас няма спецыялістаў, якія маглі б сустрэць вас» ці проста кідалі тэлефонную трубку. Цяпер усё часцей чуем «так». Яшчэ адна праблема, якая застаецца для нас актуальнай, — гэта матэрыяльнае забеспячэнне нашых праектаў. Уся валанцёрская дзейнасць трымаецца выключна на ініцыятыве.
Што да нарматыўных дакументаў, якія б рэгулявалі дзейнасць валанцёраў, яны павінны быць абавязкова. Хацелася б, каб у іх былі прапісаны функцыі валанцёраў у розных сферах з указаннем неабходнасці праходжання навучання па тым ці іншым кірунку. Але пры гэтым галоўнае — не згубіць душу і не заарганізаваць сістэму.
«Умець бачыць радасць»
Студэнт 4 курса мінскага філіяла Расійскага дзяржаўнага сацыяльнага ўніверсітэта Іван Весялкоў вучыцца па спецыяльнасці «Сацыяльная работа». Валанцёрская дзейнасць для яго — тое, што дапаможа стаць добрым спецыялістам. Хлопец піша навуковае даследаванне на тэму валанцёрства, удзельнічае ў семінарах і трэнінгах і хоча быць карысным для грамадства, дзяржавы і сваёй сям’і.
— Калі паступіў ва ўніверсітэт, яшчэ не меў уяўлення пра тое, на каго вучуся. Аднойчы мне прапанавалі паўдзельнічаць у трэнінгу па падрыхтоўцы валанцёраў «роўнага навучання» па прафілактыцы ВІЧ-інфекцыі «Ведай! Разумей! Дзейнічай!», які праводзіла Беларуская асацыяцыя клубаў ЮНЕСКА. Цяпер я вяду актыўную валанцёрскую дзейнасць у гарадской арганізацыі «Пазітыўны рух». На яго базе працуе цэнтр сацыяльнага суправаджэння «Скрыжаванне», дзе праводзіцца сацыяльная прафілактыка, кансультаванне, дыягностыка сацыяльных праблем людзей, якія жывуць з ВІЧ, спажыўцоў ін’екцыйных наркотыкаў, а таксама іх блізкіх.
У любой рабоце ёсць праблемы, і не важна, з кім табе даводзіцца мець справу. Працуючы валанцёрам, я часта бачыў боль і пакуты людзей. Таму пры добраахвотнай працы вельмі важна ўмець бачыць радасць, шчасце, любоў і дабрабыт.
Як правіла, тыя, хто працуюць валанцёрамі, вельмі адказныя людзі. Кожны валанцёр атрымлівае магчымасць асобаснага і кар’ернага росту, адчуванне сваёй запатрабаванасці, а галоўнае — станоўчы досвед дапамогі бліжнім, на які многія забываюцца ў імклівым віры жыцця. А гэта ж, напэўна, і ёсць самае важнае — не даць знікнуць чалавечнасці на Зямлі.
Дзіяна Серадзюк