Базы дадзеных

Грамадcкія аб’яднанні, Фонды, Праекты, Маніторынг, Прэса

Трэці сектар

Навіны, Мэнэджмэнт, Некамерцыйнае права, Праграмы і конкурсы

Аб'яднаны шлях

Пра нас, Выданні, Праграмы, Лінкі і банеры, Кантакты

ngo.by → Маніторынг беларускай прэсы → Звязда

Побач з тураўскім лугам

№82(26946) 05.05.11 Май — час вяртання з выраю птушак. Трэці год запар на пачатку мая ў старажытным Тураве адбываецца незвычайны фестываль, ініцыятарам правядзення якога з'яўляецца сусветна вядомая беларуская грамадская арганізацыя "Ахова птушак Бацькаўшчыны". Зноў на гарадской плошчы сабраліся і тураўчане, і жыхары навакольных вёсак, якім цікава больш даведацца пра знакаміты тураўскі луг, побач з якім праходзіць іхняе жыццё. А можа, і стаць прыхільнікам захавання гэтага найважнейшага біятопу на прасторах Еўропы. А чаму б і не? Чаму гэты куточак Палесся цікавы жыхарам іншых краін (і нават арнітолагам Каралеўскага таварыства аховы птушак Вялікабрытаніі), але не заўсёды цікавы самім палешукам? Фестываль якраз і праводзіцца для папулярызацыі прыпяцкага берага, на якім вольна раскінуўся тысячагадовы Тураў.

 Людзі прыйшлі і прыехалі адчуць свята, паўдзельнічаць у ім, павесяліцца, убачыць сталічных артыстаў, парадавацца за сваіх, мясцовых. На фестывалі гучалі песні ў выкананні фальклорных і дзіцячых гуртоў, лілася старажытная музыка дудароў. Дэфіле на тэму птушак падрыхтавалі тураўскія старшакласніцы. Дзеці ляпілі з гліны і малявалі на асфальце птушак, а майстар-класы ім давалі мастак з Мінска Алесь Квяткоўскі і кераміст з Шуміліна Уладзімір Каласкоў. Вучняў з суседняй з Туравам вёскі Хільчыцы прывёз на свята даўні звяздоўскі падпісчык настаўнік геаграфіі Васіль Шруб, які імкнецца прывіць сваім выхаванцам разуменне ўнікальнасці тураўскага лугу і неабходнасці яго захавання.
— Яго даў нам Бог, а дзеці, калі вырастуць, будуць працаваць для захавання і папулярызацыі лугу і яго насельнікаў — птушак, — са спадзяваннем сказаў Васіль Ануфрыевіч.
Прадстаўнік Каралеўскага таварыства аховы птушак Норберт Шафер, які прыехаў з Англіі, зазначыў, што тураўскі луг па сваёй значнасці стаіць на адным узроўні з іншымі вядомымі куточкамі свету, таму з боку Каралеўскага таварыства будзе ісці падтрымка важных праектаў па захаванні гэтага біятопу.
 
А ці ведаем мы, колькі птушак у гэтыя дні на тураўскім лузе? Вось што сказаў на адкрыцці фестываля дырэктар АПБ Віктар Фянчук: "Падчас вясновай міграцыі каля Турава знаходзяць сабе прыстанак больш за 50 тысяч гусей, больш за 100 тысяч турухтанаў (від кулікоў) і больш за 30 тысяч качак".
А ў гэты час на ўскраіне горада ішла звычайная праца навукоўцаў: на станцыі кальцавання (дарэчы, адзінай у Беларусі) прафесійныя арнітолагі і валанцёры працягвалі весці ўлік птушак, кальцавалі і выпускалі іх на волю. А ў самым тураўскім цэнтры на помніку куліку-марадунцы нарэшце з'явілася адноўленая скульптура птушак, якая некалі стала ахвярай мясцовых вандалаў. Тураўскі фестываль птушак якраз і праводзіцца для духоўнага ўзбагачэння людзей і сапраўды дае магчымасць адчуць гонар за свой, Богам дадзены край.
Анатоль Кляшчук
 

 

6 траўня 2011

Маніторынг беларускай прэсы

Праграмы, конкурсы, вучоба
Міністэрства юстыцыі інфармуе
Адказы на пытанні
Некамерцыйнае права

Інфармацыя на партале не з'яўляецца афіцыйнай пазіцыяй БРГА «Аб'яднаны шлях».
Адміністрацыя партала можа не падзяляць думкі аўтараў размешчаных матэрыялаў.

© БРГА «Аб’яднаны шлях», 2003—2010
Пры выкарыстанні матэрыялаў партала спасылка на крыніцу абавязкова.