Вучыцца і працаваць — магчыма!
№ 17 (27627)30.01.14.Напрыканцы мінулага года сацыёлагі з НІСЭПІ (Незалежнага інстытута сацыяльна-эканамічных і палітычных даследаванняў) прэзентавалі даклад пад назвай «Моладзь Беларусі на рынку працы і ў сістэме працоўных стасункаў». У ім згадваюцца лічбы, якія прымушаюць задумацца. Так, больш за 81 працэнт маладых беларусаў хацелі б мець уласны бізнес праз 10 гадоў, пры тым, што многія з іх сёння з’яўляюцца… беспрацоўнымі. Сярод галоўных прычын, па якіх моладзь не ідзе працаваць, называюцца нізкія, па яе меркаванні, заробкі і адсутнасць на рынку той працы, якая б яе цікавіла. Менавіта пошукам вырашэння праблемы моладзевага працаўладкавання быў прысвечаны форум «Праца як яна ёсць», праведзены нядаўна ў Інстытуце журналістыкі БДУ. Арганізатарамі выступілі клуб «БРІВ» і Студэнцкі саюз БДУ.
Клуб «БРІВ» (Бізнес. Развіццё. Інфармацыя. Веды.) існуе з 2007 года. Ідэя яго стварэння належыць Студэнцкаму саюзу БДУ. Галоўныя мэты клуба — гэта дадатковая падрыхтоўка студэнтаў па асновах прадпрымальніцкай дзейнасці, дапамога ў працаўладкаванні студэнтаў, стварэнне магчымасцяў для абмену інфармацыяй і ведамі паміж удзельнікамі клуба.
— За час свайго існавання клуб правёў вялікую колькасць мерапрыемстваў, аднак у 2011 годзе адбылася змена саставу арганізатараў і… актыўнасць значна знізілася,?— распавяла кіраўнік клуба «БРІВ», студэнтка 3 курса Інстытута журналістыкі БДУ Таццяна Матусевіч.?— Летась у кастрычніку нашымі намаганнямі дзейнасць клуба была адноўлена. Літаральна за паўтара месяца мы распрацавалі праграму форуму «Праца як яна ёсць» — і вось яе вынік. Заяўкі на ўдзел у форуме падалі 140 чалавек, але, на жаль, мы змаглі пацвердзіць удзел толькі для 80 — з?за абмежаванай умяшчальнасці аўдыторый.
Удзельнікі былі размеркаваны на тры секцыі. Вядучымі першай сталі спецыялісты сферы HR (ад англійскага human resources — літаральна «чалавечыя рэсурсы»): два прадстаўнікі прыватных кадравых агенцтваў і супрацоўнік дзяржаўнай службы занятасці. Сярод найбольш перспектыўных спецыяльнасцяў імі называлася, у першую чаргу, праграмаванне. Менавіта ў гэтай сферы цяпер адчуваецца моцны недахоп высокакваліфікаваных кадраў. Усе вядучыя сышліся на адной думцы: сучасная моладзь часцей за ўсё вельмі сябе пераацэньвае, хоча мець «усё і адразу». Вакансіі з пазнакай «старт кар’еры» і невысокім заробкам рэдка знаходзяць водгук. Па меркаванні спецыялістаў, менавіта з такіх прыступак і трэба распачынаць сваю кар’еру маладым спецыялістам, звяртаючы ўвагу на перспектывы росту.
Тэмай другой секцыі было выяўленне ў яе ўдзельнікаў псіхалагічных схільнасцяў да розных прафесій. Вядучымі былі спецыялісты па падборы персаналу з прыватных кадравых агенцтваў.
На трэцяй секцыі выступалі маладыя людзі, якія адкрылі ўласную справу ў студэнцкія гады. Яны дзяліліся з аўдыторыяй сваім досведам, давалі канкрэтныя парады. Пасля перапынку для ўсіх удзельнікаў працавала адна вялікая секцыя. Разглядаліся правілы напісання рэзюмэ, сакрэты паспяховай гутаркі. Асобным вялікім блокам праходзіла выступленне спецыялістаў у прававой сферы. Асаблівую ўвагу яны звярталі на правілы размеркавання і магчымасць сумяшчэння працы і вучобы ў ВНУ. Пасля на гэтую ж тэму сваімі сакрэтамі дзяліліся студэнты БДУ, МДЛУ і БДУІР, якія атрымлівалі вышэйшую адукацыю паралельна з працай.
Сваімі ўражаннямі пасля закрыцця форуму зноў падзялілася Таццяна Матусевіч:
— Якія водгукі? Напрыклад, «я зрабіў бы зусім інакш» — з падрабязным апісаннем. Многія ўдзельнікі прапанавалі сваю дапамогу ў арганізацыі будучых мерапрыемстваў. Некалькі чалавек прасілі кантакты спікераў для далейшых зносін, хтосьці прапаноўваў свае цікавыя тэмы для новых сустрэч… Думаю, усе ўдзельнікі змогуць упэўнена сцвярджаць: вучыцца і працаваць — магчыма. У любым выпадку, добра, што ёсць зваротная сувязь. Неўзабаве мы правядзём яшчэ некалькі падобных мерапрыемстваў: у сярэдзіне лютага чатырохгадзінны трэнінг на развіццё памяці, у пачатку сакавіка — бізнес-гульню. Пасля гэтага будзем праводзіць вялікі двухдзённы форум.
Трапіць на мерапрыемствы клуба «БРІВ» можа кожны ахвотны. Для гэтага трэба сачыць за абнаўленнямі суполкі клуба ў сацыяльнай сетцы «ВКонтакте» або на сайце brіz.bsu.by.
Яраслаў Лыскавец.
